茶水間:同事同你講家事 避之則吉!

正常返工與老闆同其他同事之間,都好應該保持一定距離,即係話太私人嘅事都不如自己收埋,唔好畀大家多人知道,但偏偏好多人都唔知機,自己八卦人哋同事嘅家事,又要多口搭嘴,非常唔識做。其實大家有無諗過,同同事之間保持應有嘅距離,唔係保障邊個,係保障你自己咋!嗱,外國就有新聞指有位老闆無意間講咗畀下屬知自己有情婦,下屬仲以為老闆當佢好朋友,同佢交心,點知後來老闆諗諗下覺得佢知道自己秘密好危險,決定突然炒咗佢,連公司都入唔到,無仇報!所以好多時,就算人地同你講,保障自己,都係唔好聽好過!

亂畀意見好大件事

知道咗,你實無可避免要畀幾句意見,結果可能有幾個,第一個就係搞禍人哋;第二個就係畀人覺得你多;正面評語呢?對唔住喇,都好難有,除非你真係同嗰位同事好好朋友啦。

畀人誤會爆大鑊

知道人地家事,另一個危險就係萬一呢件事無端端畀其他人知道咗,頭幾個畀人懷疑爆料嘅,就一定有你份,瓜田李下,水洗都唔清啦陰公豬!

有事鍾無艷

如果發展到後期,同事不停同你Update家事,反而你成為咗佢嘅輔導傾心對象,對方有事無事都對你講,你反而會覺得煩,記住辦公室係工作嘅地方,所有外事都會阻礙你收工架!