茶水間:咁大整蠱?被同事拎咗八字去做陰婚

茅山風水呢類嘢,一向寧可信其有,就算唔會主動去搵,但都會盡量避忌一下。近日喺討論區就有一位女士,話公司有個男同事,借故話佢氣息唔好,問佢拎咗生辰八字、祖先資料等,話幫佢作下福。幾日之後,交咗一個信封畀佢,仲千叮萬囑佢唔好拆。不過樓主敵不過好奇心,拆開咗,駭然發現原來入面有一張紙,寫住「中山石岐書生霍叶懸懸卄二」,仲夾咗一張酒樓收據,寫住酒樓擺酒,20至22圍,合共2萬蚊嘅收據。樓主大驚,即時掉咗封信。唔少網友都話,樓主係畀嗰位男同事做咗「陰婚」,即係將樓主嫁咗畀先人,等樓主百年歸老後就會落去陪呢位先人,而呢位先人平日就會喺樓主身邊幫佢。但樓主擅自拆開信封仲要掉埋,即係悔婚,後果嚴重咁話。姑勿論真假,一位有咁嘅打算嘅同事,都好令人氣憤。大家身邊又有無呢種好信風水命理嘅「神婆」同事呢?

成日幫人睇掌

有啲同事成日話自己識睇掌,又唔知點解覺得係打開話匣子嘅「聯誼活動」之一,於是不停話幫人睇下手仔,但其實講嘅命理可能只係半桶山,反而聽嘅人會在意,放咗喺心入面就唔好啦。

幫手祈福

好似樓主呢位男同事咁,就會話可以幫同意求福避險,叫大家畀時辰八字佢,更甚者甚者會叫人畀頭髮或指甲;大家信唔信都好,千萬咪咁傻豬言聽計從呀,畢竟身體髮膚受諸父母,無理由「豪」畀人啫。

養邪嘢

呢啲同事就更得人驚,就係會自己喺屋企養邪嘢,仲要大大聲唔怕話畀人知,呢類同事大家要小心,因為有唔少師傅話,養呢類嘢係要吸引其他人靈位,大家隨時係對象之一,小心小心。