茶水間:有父幹唔可惡 最可惡係當自己無!

香港呢一個怨氣咁重嘅社會,基本上已經變成二分法,一種係有父幹,一種係無。當然兩者生活差距就係在於有父幹人士有齊物質上嘅一切,當然仲有香港人又愛又恨嘅「樓」啦!對於有父幹嘅人,普遍人都係又妒忌又憤恨,因為自己無吖嘛!不過平心而論,對方有父幹,其實錯不在對方,只係怪個天點解自己無;但好多時最令可惡係有好多人,明明係靠父幹先有成就,但就偏偏講到自己係憑個人努力,靠屋企。但明眼人只要一睇,就知「無父幹,你又點會有令日先?」

物業大王但首期係老豆畀

前排有單新聞指有位喺英國讀書嘅香港人,點樣廿幾歲已經手執幾多層樓收樓,講到自己好有投資眼光,好有研究好識睇準時勢,話自己「白手興家」,然後大家再細睇,原來又係靠老豆供佢去英國讀書,再畀100萬佢買第一間樓嘅首期。

自己搞生意但本金老豆畀

亦有唔少富二代成日話自己搞創意產業,推陣出新諗新嘢,話自己幾忙忙一早起身就開會,然後要打理全公司幾十人,好繁忙,話想靠自己,所以唔加入Daddy間公司;但佢自己間公司,本金咪又係嚟自老豆!

企上紅館再多謝媽咪

又有啲歌手,每次出現都將亡母放喺口邊,再講到自己有幾努力堅持,堅持保持自己個身型,不懼世俗目光,近日再上埋紅館開演唱會,繼續多謝阿媽;但講嚟講去,無佢阿媽喺娛樂圈嘅影響力,比佢出色幾多萬倍嘅歌手,一世都無機會上紅館!