茶水間:無品香港人 3大衰格揀位法

香港人最習慣就係逼,一出街基本上已經炆,成日有唔少人講笑話,話「行路都要考牌」,因為好多人行路真係盲衝衝,或者突然停低、轉身,令人好鬼激氣。但其實對比起行路,你地仲有無諗過連坐位一樣係需要考牌呢!唔好誤會,唔係講爭議好大嘅「關愛座」咁大路;而係日常生活之中,一樣有好多關於坐嘅禮節,其實好多人唔知。

睇戲漏低最邊一個位

好多時上戲院買飛,就會見到唔少人買飛係特登買淨最側邊邊嘅位,或者明明中間仲有1-4號位,佢哋就會買2、3號,特登淨返1、4號,夾硬由原本兩個雙排位變咗有兩個單丁位;講到尾咪又係想用埋兩邊嘅位!

地鐵死要坐中間

繁忙時間坐地鐵,有位已經要感恩,但好多時候有人明明見到有一排連位,但係都要坐中間,搞到想一齊坐嘅人被逼要分開坐;其實明知一定會坐滿,點解要靠住邊坐,留番嘅連位畀人呢?

坐巴士小巴唔坐埋邊

好喇,呢一種人又係奇怪,就係坐小巴或巴士雙座位時,死都唔會坐埋窗邊嘅;係,有時知道自會早啲落車,所以坐側邊都無可厚非,但好多人純粹希望坐側邊,無人入到去坐窗邊,咁自己可以一人坐兩個位,鬆動啲!