茶水間:細佬原本讀緊大學 中途退學日日打機?

香港大學生之多,簡直可以話係基本入場券,好多人都覺得大學本科畢業根本已經唔值錢;不過講還講,讀始終係要讀,否則就真係好傻豬喇。近日討論有人話自己細佬本身讀緊大學工程嘅Degree,Year 2之時話覺得自己完全無興趣讀呢科,於是決定Quit U,轉去演藝讀音樂表演。但讀咗一年,又話原來讀音樂唔係淨係玩音樂咁簡單,係要學埋樂理等知識。最後又係自己Quit,結果宜家日日喺屋企,失業失學,掛住打機終日。仲話個個師兄都同佢講,話讀大學無用,識人好過識字,個個搵工都只係講經驗。令呢位網民非常頭痛,唔知點樣勸服細佬去重新讀書。的確好多人都話讀書拎張沙紙無用,仲話Steve Jobs,Bill Gates都係中途Quit U;但你諗深一層,喺香港呢個社會生存,無讀Degree,向上流嘅機會係難好多架!

廣交人脈

的確講得啱,好多時做嘢都係講人際關係,但講大學正係你廣交將來人脈嘅重要一環,包括你嘅同學,更包括好多時去實習會認識嘅人,好大機會就直接變成你將來嘅老闆。

未有明確目標

無錯有好多成功人士係Quit咗U,但大前題係佢哋擁有一個明確目標,仲要好有信心自己嘅強項;何況,成功嘅就嚟嚟去去都係讀幾個,失敗嘅幾多千百個就從來無人知。

長遠發展

雖然好似有個Degree同無Degree搵嘅工作入息起步時差唔多,但人望高處,往後發展必定係會愈拉愈遠,例如升職,再進修等等,講真無論係選擇性同彈性都比較高。