茶水間:香港的悲哀現實 年輕人不再想腳踏實地

香港生活,好難,無父幹的話,上車無期,大部人月入數萬,仍然望樓輕嘆;正當大家發現努力工作似乎都唔係如父母所講,可以達成夢想,甚至連基本生活需求都做唔到之時,好多香港人開始放棄一直以嚟嘅社會標準,即係學咗走精面,甚至破壞規距。好似日前討論區就有人話,原來自己一直坐地鐵都買長者票,兩年嚟只係被捉過兩次,計番絕對有賺。當然有唔少正義網民不恥呢種行為,但與此同時都有好多人竟然支持,話無理由得長者有補貼,要補貼就應該連有工作有為社會貢獻嘅人士都要一視同仁。更有人直言,時下於香港生活,「就應該努力做一個不老實嘅人」。香港嘅年輕人,有呢種心態,其實都唔係話不能理解,以下幾個原因,你哋同唔同意?

努力工作 未能安居

承上面講,香港樓價已經失控,正常一個大學生,月入3萬的話,亦根本無希望置業,而且個勢仲要升得比大家加人工速度快,面對咁嘅情況,努力返工,仍然睇唔到前景,惟有諗埋一邊。

殺人放火金腰帶

君不見幾多人發達都係靠走偏門,心智一唔夠成熟就會隨時想走歪路,期望以最快途徑搵到快錢;當然呢個都係因為社會風氣嘅改善,近年好多有財有勢人士可以完全脫離法律責任,至畀人有呢個錯覺。

識人好過識字

雖然一直以嚟都知呢句說話,不過似乎香港愈嚟愈貼近鄰近地區嘅文化,似乎用人事關係先係上位捷徑呢。咁既然係咁,大家又何必咁腳踏實地,倒不如走下精面,慳返啲時間同人打好人際關係吧啦。