落雨都冇有怕!嚴選本地5大室內遊樂熱點

雖然兒童節過咗,不過嚟緊仲有復活節長假,相信唔少家長都會為要帶小朋友去邊度玩而煩惱。近年室內遊樂場愈開愈多,唔駛怕落雨,又有小朋友最鍾意嘅波波池、滑梯、彈床等遊樂設施,絕對係放電好地方,即刻幫你挑選本港5個必去室內遊樂場。

1.高質木系名牌玩具

名叫綠悠遊Greenfield,佔地4000呎,以森林和原野為主題,走高檔清新格局,大sell高質及品味,除咗有坊間罕見嘅兒童木工區同埋露營區,引入嘅玩具都係高級牌子,好似HAPE同LEGO積木、Bosch木工工具、Vileda兒童地拖車、木系廚房等等,啲玩具靚到連大人都想玩埋一份!

地點:尖沙咀梳士巴利道3號星光行東座533室

2.復活節親子遊園

15,000呎超巨型主題親子玩樂區登陸馬鞍山,由4月13日起,We Go MALL 與百田遊園攜手打造《復活節親子遊園》,設有多個新奇好玩主題玩樂區,包括15呎高充氣迴旋木馬彈床、巨型機動遊戲、賽車競賽場、旋轉韆鞦、夾公仔機等,包你寶貝仔女玩足一日都唔願走!

地點:馬鞍山保泰街16號We Go Mall地下中庭及1樓遊樂區

3.平價迷宮波波池

禾輋廣場「美國冒險樂園」早前只係開放擲彩虹、投幣式遊戲機及夾公仔機區,最近連「彈跳迷宮」都開幕啦,雖然佔地唔大,但總算嘅五臟俱全,而且價錢夠平,假日全日任玩都只係$80,旁邊又係街市,方便一眾媽媽們。藍色系波波池夠夢幻、雙層迷宮裡有唔同障礙及機關,另一亮點係其中一個小型波波池以星際為題,搭配STEAM遊戲設施,玩之餘仲可以透過遊戲去刺激及啟發小朋友腦部思維。

地點:沙田禾輋廣場R1號舖

4.離島玩空中漫步

EpicLand歷奇王國(原名Discovery Land)係愉景灣一個大型室內遊樂場,樓底有幾層樓高,就好似一間放滿七彩遊樂設施嘅體育館,當中必玩佢個皇牌遊戲踩鋼線air trek,戴好安全帽、安全繩,然後喺高空經過唔同關卡行走,雖然做齊安全措施,但幾層樓高,好刺激,啱哂訓練小朋友膽量!另外仲有充氣彈床、30米長七彩滑梯、迷宮等,小心小朋友玩到失控!

地點:大嶼山愉景灣愉景北商場地下G31

5.定期換色波波池

港島人好似冇咩選擇?台灣親子餐廳「大樹先生的家」兩年前進駐香港,首間分店設於茘枝角D2 Place,第2間分店就喺銅鑼灣,地6000呎,以運動為主題,喺唔同遊戲區添加籃球、足球、網球及攀爬區等元素,另一特色就係融合STEAM,其中一個機械人遊戲區,小朋友可以喺工作人員的協助下,成功編程控制機械人。最後不得不提其標誌性遊戲區-波波池,波波全部自家生產,定時每三個月換一次顏色。

地點:銅鑼灣告士打道311號皇室堡15F

圖片來源:相關公司fb專頁

相關文章:

荔枝角電影主題市集 手繪電影插畫+花火音樂會

復活節活動2019 | 香港好去處 荃灣南豐紗廠新店一覽 | 交通+打卡位

【復活節好去處】香港商場活動打卡展覽懶人包