葡萄友:一結婚就變生仔機器?新婚夫婦一定要努力造人 ?

早幾日情人節一個二個都用儘方法去曬幸褔同放閃,搞到一般人都要戴番副超同無乜事都早啲番屋企。要講到最曬應該都係周董周杰倫,話說佢係情人節當日就放咗張出海嘅相,老婆昆凌個肚明顯開始突出,加上周董寫住「該媽咪的前世情人到來了」,咁講法意思即係今次應該係個仔喎,認真恭喜。佢兩夫婦14年結婚,15年就生咗個囡囡,估唔到話咁快又有BB,三年抱兩非常利害,唔通生仔真係會生上癮?

母愛泛濫

唔少媽媽係生完BB之後都母性大發,變得更溫柔同充滿愛心,而且生過一次變得有經驗,要再生多個嘅時候都淡定啲同知道點樣去應付各種嘅痛楚同不適。

有仔襯嫩生

經常都聽人講呢句話,而事實上亦真係有道理。媽媽後生嘅話BB都會比較健康,患先天或遺傳病嘅機率亦都相對較低。而且早生嘅話媽媽產後回復得都比較快,仲容易修身keep住個靚樣。

湊個「好」字

華人始終都係比較傳統嘅,除了鍾意屋企多幾個小朋友熱熱鬧鬧之外,如果第一胎係女,然後再追埋個仔,湊個「好」字出黎,又開心又有個好意頭。

仔女有個伴

得一個小朋友嘅話,慢慢睇住佢大就會開始發現無人同佢玩好似好慘好可憐咁 ,到時先生可能就太遲啦。所以有計劃嘅就會生多個,等小朋友第時互相有伴之餘亦都可以由細個起學識同人相處。

相片來源:周杰倫 @Facebook