葡萄友:售價$16,000名牌袋 與IKEA購物袋撞款?!

Fashion嘅嘢,你真係識條鐵咩!好多人平時都會對所尚高級時裝指指點點,例如啲好標奇立異嘅衫呀咁,當中女士嘅手袋更最令男人心寒,明明望落好普通一個款,售價卻離地到震。然後女士們卻心甘情願大手入貨,好多女士話:「女人睇女人,第一眼就係睇手袋。」所以,手袋唔慳得喎。

近日法國著名品牌Balenciaga就推出一個男女士都適用嘅手挽袋,售價為$2,145美金,折合成$16,000幾港幣,眼利嘅網民睇真少少,好熟口熟面,再睇一睇,喂阿哥,呢個係IKEA賣 $5個嘅手挽袋嚟喎!當然人哋$16,000個袋標榜Made in Italy,又用純羊皮製咁,質量一定係好,但無論款同顏色都幾近9成似。好多男人,又或者入世未深嘅少女,可能都唔明一個咁嘅袋,點解賣到咁貴,以下6大原因,簡單直接講你知。

設計師大名
手袋本身貴在唔係質料款式,係貴在邊個設計,好似Balenciaga話事人係Demna Gvasalia,設計乜都有人捧場讚靚;今次出IKEA款已經好好,前幾年佢出過紅白藍袋,連GD都有用呀!

經典款式
好多Brand都係靠一、兩經典款式,持久不衰就賣到成行成市,好似Hermes嘅Birkin袋咁,售價最平1萬美金,要訂仲要等6年!而且對買家仲有好處,第一係唔怕過時,第二係有二手市場。

名人效應
除咗搵有份量嘅代言人之外,女士們更深信唔收錢但會用嘅名人多啲,手袋界一直有三大鐵三角,曾戲言只要有佢哋是旦一個用過,個袋就會升價百倍,分別係Grace Kelly,Jane Birkin同Jacqueline Onassis。

歷史故事
Luxury牌子要講歷史意義,每個品牌都要創造一系列當初創作嘅意念、動機等,例如Hermes、Cartier、LV等等都係由18、19世紀開始,令人買嘅時候感覺唔係單單一件產品,而係連埋背後嘅故事。

手袋質量
雖然唔係話貴一定就係好質量,不過通常都係一分錢一分貨,一個名牌手袋如果保養打理得好,使用恰當分分鐘可以用幾十年架。

限量版
呢樣唔使多講啦,物以罕為貴,何況畀得起錢嘅女士,又點甘於成日同人撞袋呢,所以宜家好多Limited Edition出現,仲有埋編號,驚死人唔知係限量呢。