葡萄友:寂莫嘅人寧願要假朋友 都唔想同真人做朋友

日本一向被視為「最寂莫」嘅民族,眾所周知因為出現好多奇怪服務,租借女友、租借大叔等,都係為咗排解一下心中嘅孤獨。最近日本又出現奇怪服務,就係有公司提供大量「假朋友」,等大家可以喺社交媒體上盡情咁Add!大家一直嘅理解之中,明星會買「假粉絲」,等自己個FB、微博好睇啲,估唔到宜家竟然有假朋友,呢班假朋友當會有埋相、基本資料,甚至喜好、年齡都有,而且公司職員甚至會以假朋友身份同你傾計,排解寂莫。成個收費為2個鐘8,000日圓,即係$550港幣,都唔係貴喎!

我知我知,好多人會話,用幾百蚊買幾個鐘人哋陪你傾計,點解唔拎去識真朋友,出去食下飯用咗佢仲好啦!其實好多時候寂莫唔係咁簡單可以解決,好多人就算經常同朋友一齊玩,睇落好似好開心,其實心入面嘅寂莫比所有人都大,只不過無表達出嚟。寂莫人,好多時只求片刻嘅理解,如果用幾百蚊可以買到呢份喜悅,又何必要同真人Social呢?寂莫人仲有咩特點,不如睇下:

狂歡過後更寂莫

承上文所言,就算一大班朋友一齊,唔代表就會唔寂莫,寂莫早種心裡,一到朋友盡散,自己一個時,會比之前更感覺到寂莫。所以好多人寧願收埋自己,唔出去唔搵朋友,就係唔想體驗呢種狂歡過後嘅孤獨感。

只要關心不問原因

寂莫嘅人好多時只係喜歡收埋自己唔希望人哋知道;每個人身邊總有一位朋友,你明明察覺到佢唔開心,但你每次問,佢都唔肯講,問多幾次甚至發脾氣;其實佢哋需要可能係人哋對佢嘅關心態度,而唔係追問佢哋原因呀。

需要時間獨處

好多時大家有個誤解,覺得「寂莫咪陪佢多啲」;其實寂莫嘅人好多時候反而唔鍾意同其他人相處,要解決寂莫,唔係代表要成日陪住佢,反而會令佢不安令佢煩;寂莫嘅人更鍾意一個人獨處,享受自由自在,只有自己先可以成自己嘅知己,明唔明?

從來無人明白我

唔好嘗試講空白無意義嘅說話去安慰寂莫人士,唔好乜都話「我明白你」、「我知你感受」,其實寂莫嘅人天生有一種孤獨感,總係覺得「呢個世界無人真正明白自己」,所以唔好再講呢啲說話,有時候安靜嘅陪伴更勝千言萬語。