葡萄友:從化骨龍變前特首鄰居 張家輝先係真。香港仔精神

樓市瘋癲,但有實力嘅人依然無懼風浪照樣入市,好似影帝張家輝就據悉啱啱用咗1.3億購入中半山傳統豪宅,仲要係首次置業,同屋苑仲有大批名人,例如前特首董建華等。一個土生土長嘅香港仔,從亞視走到大銀幕,從「化骨龍」變影帝,完完全全係典型香港人嘅拼搏精神,可以話呢1.3億真係靠自己挨出嚟。通常有名人置業,網民都唔多鍾意,可以係唔忿氣演藝界賺錢容易?但今次張家輝買樓,網上就出奇地大獲好評,大家都覺得佢係真真正正靠實力賺返嚟。尤記得好多年前張家輝一個廣告之中,講投資理財,一句金句:「好多人話你宜家無,但將來會有。」張家輝今日有喇,靠嘅除咗堅持、努力同實力,另外究竟仲係咩呢?

甘心從低做起
由亞視開始張家輝開始入屋,但後來毅然離開轉投電影界,其實係一個好大嘅賭博,畢竟去到拍電影,都係做一啲「低俗」嘅角色同情節,但張家輝依然非常專業,做足百分之二百,天將降大任於廝人也,必須勞其筋骨,終於畀佢等到一個機會轉型。

伯樂扶持
講實力又好,講堅持又好,其實大把人可能比你堅持比你努力,但你要贏人就必定要有伯樂睇得起你,幫你發圍;張家輝一直拍王晶嘅爛片,後來被動作導演林超賢睇中,先轉型成宜家嘅動作演員,殺出一條新血路,成功開啟張家輝第二個事業。

有家人支持
係人都知張家輝有個好賢妻,就係關詠荷,當年佢身為大台第一女花旦,下嫁無論名氣、身家比佢少得多嘅張家輝,無懼閒言閒語,成為一直喺背後支持佢嘅女人;男人得一賢妻做避風港,出面挨得再苦都唔怕啦!