裝修愛巢用一大畢錢 夫婦未入伙先嗌大交

香港地買樓難,幾多年輕人死慳死抵先儲到錢,挨麵包、唔遠遊,終於儲到一畢首期上車,原本應該係開心快樂事,不過原來仲有一大畢錢要使!連X討論區就有人話自己同老婆儲咗5年錢,啱啱今年結婚,近日買入一間位於土瓜灣嘅二手樓,由於首期幾乎用盡所有積蓄,老公諗住簡單裝修一下就入住,之後再慢慢執;但老婆卻持相反意見,覺得咁辛苦買到樓,當然要裝修一番,合乎自己Dream Home模樣。雙方最傾咗好多次,最後都決定搵裝修公司進行「小規模」裝修。不過大家都知,裝修用錢有如無底洞,一開始Quote嘅價,只會不斷上升,最後價錢超出佢哋預算,甚至動用埋雙方儲落為將來生仔用嘅「BB基金」,亦要向各自父母出手救助。

為咗呢件事,兩公婆又再大吵一場,老公當然埋怨老婆,唔明點解一定要大裝修;老婆亦解釋話預算用多咗係裝修公司問題,覺得自己無故被理怨好慘。網民就認為彼此其實都有責任;新屋當然想裝修,無人想自己搬入又殘又舊嘅居所,所以老婆嘅諗法絕對可以理解,甚至一早應該將裝修費用計埋入「上車」基金之中;不過老婆都要諒解一下,上車都只係猛猛緊,應該將貨就價,要識得慳,可能用料上慳、可能係設計上慳,未必做到100分自己想像咁樣,做到70分已經可以收貨。老公呢作為一家之主,除咗要主導裝修工程,不斷跟進過程同監察住用錢方面,小心留意裝修公司有無濫收費用;同時自己都可以去格下價,比較一下用料,咁先唔會被裝修公司當你乜都唔識咁開價。

一個屋企,最重要係家人,並唔係間屋有幾大、用料有幾貴,所以大家一定要理性避少拗撬,唔好傷害到雙方感情,恨錯難返!