譚德塞幾時去武漢大大啖嗦啲空氣證明冇事?

世衛將武漢肺炎全球風險由「高」提升為「非常高」,但仍然拒絕承認武漢肺炎「大流行」,話用依個形容無助控制肺炎,仲話武漢肺炎到而家都係可控制⋯⋯What?


由中國爆到去義大利、美國、伊朗咁遠,甚至係世衛總部嘅日內瓦,由中國人傳入再到出現疑似社區爆發,我睇唔出邊個國家真係有信心可以企出嚟用中國嘅口吻話武漢肺炎「可防可控」;又如果大流行係要去到歐洲黑死病咁嚴重先可以算係嘅話,到時死咗幾千萬人你先出嚟同大家講「今次真係好大件事」,我洗咩要你依個衛生組織?我有眼睇喇到時,就係要喺未完全失控前由你提醒大家保找危機感啊On9。


世衛嘅宗旨係「使世界各地的人們盡可能獲得高水準的健康」,而佢地嘅其中一個千年發展目標係「與愛滋病毒/愛滋病、瘧疾和其他疾病做對抗」,但就武漢肺炎依件事嚟睇,世衛除咗讚中國Well Done之外就冇做過啲乜嘢實際行動。世衛一直都唔想大家覺得武漢肺炎係好大鑊,企圖淡化全球對今次疫情嘅危機感,依個行為同佢地嘅理念完全係背道而馳。特別係佢地嘅總幹事譚德塞仲想塑造中國係控制疫情嘅英雄(明明就係中國搞依攤蘇州屎出嚟),我真係唔知佢收咗幾多利益,或者痴咗邊條線。


明明譚德塞咁欣賞中國,明明佢講到中國其實疫情唔係咁嚴重,明明世衛有派人去中國調查,點解譚德塞唔跟埋去,除低口罩後大大力嗦一啖武漢嘅清新空氣,然後同大家講咩事都冇?日本福島事件人地官員都會親自食福島產品,用行動去證明啦喂。


就算中國係一個幾大嘅經濟體都好,世衛著眼嘅地方應該係人類嘅衛生同安全,而唔係去諗得罪中國會冇幾多錢(美國Cut完一半錢都仲比緊最大份,中國掛第三炸垃圾)。如果一個理應係世上公信力最高,最有影響力嘅衛生組織因為其他因素而失去佢嘅持平性,你不如摺埋佢,唔好浪費咁多資源,包括出糧比譚德塞嘅錢。


香港政府同警隊有版你睇,只要你誠信破產,重建威信唔會係一時三刻就可以做到。而世衛再任由譚德塞每日坐喺度講埋哂啲廢話,好快就會係同一下場。


FACEBOOK:https://www.facebook.com/MOYINDAY
小心輕看:https://readwithcare.com/EditorRelated/毛言地
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday