【讀者投稿】Mavis,一個患有抑鬱症的人

我係Mavis,我係一個患有抑鬱症嘅人。

患上呢個病已經有10年,睇盡人情冷暖,一沉百踩。10年前,我因為男朋友背叛而分手,由細一齊玩嘅朋友跳樓自殺,另一個車禍中喪命,爸爸媽媽被裁員失業,我就由一個salon學徒變為髮型師,壓力就由24歲呢年開始……

初初有病,唔想出街。腦海裡每秒都係過去唔開心嘅人同事,好姐妹、好朋友見我一路食藥無乜好轉,漸漸都避而不見。朋友原本就少嘅我,開始無人再願意打俾我,我變得無朋友,好唔開心,唔知可以同邊個講。我每日就喺Facebook寫出心情,一啲唔太熟嘅朋友總係叫我唔好諗太多。

我如常返工,但藥力令我好攰,反應比一般人慢,我根本集中唔到精神。一開始唔認識我嘅人會笑我白癡婆,會兜口兜面話我係癡線嘅,之後幾個人喺度笑我。呢個病令我唔想再打工,唔想再喺呢個環境中生存。

之後我去咗busking,喺未興起時喺街幫人畫Henna印度彩繪,仲識咗兩個一齊玩音樂嘅人。佢地會周圍去busk,去過墨爾本、廣州、清邁,總之去到邊就busk到邊,當初我見到佢地,感覺世界好大,可以用自己嘅技能同做鍾意嘅事,走遍世界各地,我覺得好chill。呢種生活,我都想可以好似佢地一樣,無奈覺得病好似永遠好唔到,人正常不了。當busk嘅時代過去,我再次做返髮型師,喺公司被同事老闆問到之前喺邊度打工,我就同佢地分享咗busk嘅樂趣。當時好多人都有好多疑問:「夠食飯嗎?」「一日有幾多錢搵到?」「點解會咁樣喺條街畫,無人捉你嗎?」正當我回答之際,其中一個老闆大大聲講咗一句:坐街搵食嘅咪即係乞兒!當時我非常難受同難過,點解我一定要打工打得好有成就,先可以叫合理,先可以被人欣賞?!

從來我都係一個好自我嘅人,鍾意做乜就做乜,鍾意同邊個談戀愛就不顧一切都要一齊,但我呢種性格住住比外界定為怪人,任性、偏激,同自私。頭7年,無人理我,電話打親俾人都幾乎無人願意接聽,全世界都好似唔鍾意我,怕咗我,我想有朋友,有人真心愛我,想去未去過嘅地方,做鍾意嘅事。

直到兩年前我遇到一個人,我同佢拍拖。佢嘅夜場DJ身世比我更離奇,佢從小就失去父母,起初我以為夜場DJ 一定好貪玩,不停識女仔,但佢無,佢比好多人堅強、正路同勤力。佢叫我乜都要同佢講,事無大小都要,佢話會保護我,叫我唔洗怕。佢無介意過我嘅病,甚至曾經做錯過嘅一切。佢教咗我好多做人嘅道理,令我明白到自己本來係乜人就會有乜對待,同咗佢一齊後,我感到遇上人生伴侶一樣,好耐都無試過有人會關心我嘅過去。我覺得係命中註定要我遇到佢嚟扶我一把。佢鼓勵同支持我去做我想做嘅事,甚至肯出錢出力俾我創造自己嘅事業。

我好感恩人生遇上佢,雖然最後我地都分開了,我知道唔可以阻擋佢嘅人生發光。與此同時,我感到不一樣嘅我。我要留住佢教過嘅好,積極面對現實。

人生其實係一場有高低上落嘅角力,每一秒你唔知會遇上乜事,同咩人。當中有好嘅壞嘅,無論遇到什麼事,其實都係會令你成為更好嘅人。每一個低潮都在成就更完整嘅人生,跌過痛過,你先會知道邊個先係最後應該留守喺身邊嘅人。

而家我有固定真心理解自己嘅好朋友,成為一個初哥女Barber,嚟緊我仲會用自己搵返嚟嘅錢去泰國同日本,我唔會再停,我要走出世界睇更多人同事,我係我,無論有幾錯幾啱都好,呢個都係我。活在當下,只要你願意,你都一樣可以遇上愛你嘅人。做自己鍾意嘅事,去鍾意嘅地方,忘記過去嘅不愉快,放下仇恨,做一個開心快樂嘅人 …… 我叫 Mavis。Thank you。

撰文: Mavis

___________________

活過不白過
Follow us on IG:https://bit.ly/2yjkquY
___________________

#OnlyLiveOnce #讀者投稿