變國際巨星變影后 重溫那些年的地獄廚神

大台嘅《美女廚房》目前愈做愈爛,令一眾捧場Fans睇到好尷尬,無不懷愐當年由鄭中基、方力申、梁漢文組成嘅黃金檔,而且當年除咗主持有料之外,一眾美女嘉賓更加係「交足功課」,比起廚藝高超嘅,幾大地獄廚神更加令人難忘。以下幾位經典中嘅經典,除咗娜姐周秀娜之外,好似都已經退隱江湖,睇嚟不復再見佢哋再次落廚房喇:

垃圾味蒸魚-周秀娜

播出日期:2009年5月31日

當年娜姐仍然係𡃁模一姐,佢煮嘅菜式係蒸魚,但竟然無端端用刀斬到全條魚爛晒,誤以為係會「易熟啲」,之後放入鑊中蒸嘅時候,不時打開蓋檢查,令水蒸氣流失,最後製成品疑似未熟發出陣陣垃圾臭氣,一眾主持食完即去垃圾桶嘔,獲得全部評判一致「-10」分!

地底泥米線-椋名凜

播出日期:2009年7月12日

來自日本嘅椋名凜以墨魚作菜式,但無洗乾淨墨魚汁,再加入蝦膏,令成碗米線無論味道及顏色都近似糞便,有人更形容為「地底泥」,試食嘅黃宗澤即時嘔吐大作,並用白花油狂漱口。另有現場觀眾試食完即時入院,疑似食物中毒。最後一致獲得全部「-10」分。

屎味魚蛋-G.E.M

播出日期:2009年5月17日

當年未成為宇宙G.E.M,以魚肉炮製魚蛋,但由於無避腥,成碟魚蛋尤如屎一般嘅腥臭味,最後所有試食評判都立時吐出再跑去廁所嘔;就連身為G.E.M小Fans嘅一位現場觀眾,一邊口話好味,但之後亦立刻跑去廁所,成為最年輕嘅「地獄廚神」。

延伸閱讀:

周秀娜你今次仲唔死

盤點美女廚房7大新地獄廚神