買定三日菜

好集慣

學袁國勇教授話齋:「抗逆時間,盡量減少去人多擠迫地方,或少點出街是避免感染的不二法門。」但每個家庭還是要解決一日三餐的問題,最好還是減少外出用餐,盡量在家做飯最好。當然,到最後還是要去買餸。其實,只要懂得貯存蔬菜,買定幾天蔬菜也不是問題!

千祈唔好洗
「非常時期,緊係多咗買菜;唔少人更是買定幾日菜啦,唔使日日出街買嘛。」周記蔬菜檔老闆扯大嗓門地說。「蔬菜唔同豬肉、海鮮咁要日日新鮮,只要貯存得宜,的確可以擺幾日㗎;想要啲菜攞得耐啲,唔嫌煩呢,最好先以抺手紙包裹,然後外面噴點水,既可避免葉片腐爛又可保濕,才放入蔬菜格,咁就擺三日都無問題。」

當然,不同蔬菜貯存期各有不同,一般而言,葉菜類白菜、菜芯、芥蘭能耐放一點,西洋菜、豆苗較容易爛;根莖類如洋葱、蘿蔔、薯仔等可放耐一點,甚至根本不用放入雪櫃,通風便可;另外,薑、葱、蒜等調料都一樣,但要注意的是根莖類或薑葱蒜放得太耐會發芽或變乾,要再保存好一點,可以用錫紙包裹又可放得耐一些。

「基本上,洋葱、薑或蒜頭,即使發咗芽,只要切去發芽部份,也可繼續進食,但如果薯仔發芽了就唔好食,有毒㗎!」總之,要記住,千祈唔好洗。「菜葉最怕水,浸住就會爛和霉;但就算你偷懶,就咁放入雪櫃都無問題。」

也不能急凍
「比多個有趣貼士你啦,唔係好多人知㗎,就是根莖類蔬菜呢,最好以根部向下的方式放置,因為蔬菜本身是豎着生長的,保持豎直向下便能維持其生命力,保存時間更長!」

或有人會問:蔬菜可以可以放到冰格冷藏,會唔會食用期長一點?「傻啦,葉菜根本不適合放入雪櫃冰格,否則會結冰、凍傷,令菜葉的細胞組織受破壞、水份流失,更會加速腐爛,唔食得㗎。」

「其實呢,又唔使咁擔心嘅,買定一、兩日菜就無所謂,但要是買定一星期就無謂,蔬菜永遠新鮮最有營養最好食;我夠日日喺度賣菜,戴番個口罩、勤力啲洗手咪得囉,咁鬼驚,唔中肺炎都嚇死先啦。」

撰文、攝影:郭昊軒
其他圖片來源: Unsplash