那些年葵涌廣場的戀人 原來已經行緊IFC了

大家講開葵芳嘅葵涌廣場,會諗起咩呢?相信好多人第一時間就會諗起當中嘅小食餐飲,發展至今葵廣變成一個小型室內夜市一樣,各種小食都有,而且屢被唔少媒體廣泛介紹。不過講起上嚟,葵廣其實係一個超地道商場,當中除咗食店,仲有唔少小店,賣衫賣精品,加上附近都係中學,每日放學時間已經見到唔少學生流連。日前於網上有男網民就好感嘆咁話,中學時同當年嘅女朋友放咗學,一定係喺葵廣到行,雖然每日見都係一樣嘅舖頭、差唔多嘅食店,不過漫無目的咁一直行到晚飯時間,迫不得已要各自返屋企先肯走。當年兩小無猜嘅拍拖故事,既簡單又便宜。

不過樓主今年早已大學畢業,突然諗起呢位「葵廣女友」,於是上網搵下佢,發現當年嘅小女孩早已成熟唔少,IG貼嘅再唔係葵廣嘅魚蛋燒賣、$100兩件嘅衫;而喺出現喺IFC、時代廣場,食貴婦下午茶、日本鐵板燒。原來那些年嘅葵廣女朋友,早已進化成IG女神。

葵廣雖然只係一個好舊嘅商場,卻盛載唔少人嘅回憶,可惜嘅係正如香港好多地方一樣,隨時間而變化,葵廣嘅商店關完又開,早已無幾多間係當年嘅品牌,行人亦一樣,由行葵廣變成IFC,當中嘅滋味係不捨?可惜?定替佢開心?可能只有樓主先最清楚。