都市運動 GUIDE:健身休息時間

「啲教練話每個動作要做四組,組與組中間又要休息… 如果我夠力,點解唔一次過做晒四組,慳啲時間?」

Q: 點解每組之間要休息?

A: 等身體嘅肌肉及神經系統有回復嘅機會,維持每組嘅表現。

Q: 如果唔休息,或休息唔夠會點?

A: 肌肉乳酸積聚、肌肉疲勞外,心理亦會有所影響,難以維持正確技巧。

Q: 教練要我做 4 組,每組 10 次。但我真係夠力一次過做晒 40 次,咁即係點?

A: 有幾個可能性,包括:難度過低,例如啞鈴嘅重量唔夠;方法有問題,例如教練想你蹲腿 90 度,但你只係蹲咗 45 度;教練想你以慢速去做,等肌肉可以有較大刺激,但你做得太快… 等等。

Q: 咁休息幾耐為之夠?
A: 通常視乎每組嘅目標次數而定:

每組 13 至 20 次 - 10 至 90 秒

每組 9 至 12 次 - 90 至 120 秒

每組 6 至 8 次 - 120 至 180 秒

每組 1 至 5 次 - 180 至 300 秒

以上資料只係作參考,最緊要係睇實際情況。例如有位老人家啱啱做 gym,你俾個 2 磅啞鈴佢舉 15 次當係一組,咁段估你唔會叫佢只係俾佢抖 10 秒咁少卦?