【台慶改名】TVB風光不在?一幕幕《萬千星輝賀台慶》經典表演+直播求婚變集體回憶

Cosmopolitan.com.hk

無綫台慶改名又如何?《萬千星輝賀台慶》不再萬千星輝,由天王天后級嘉賓到只有小生花旦坐陣,再到近年小生花旦亦相繼離巢只剩「姐級」主持撐場,其實風光早已不在。加上近期罷睇風波一直未能平息,就算改名也不見得能收視。曾經這個被譽為「視界盛事」令到家家戶戶「愛回家」圍住電視機,有「阿姐」唱《熱咖啡》,有華仔心口碎大石,仲有偉仔同發哥粉墨登場,睇到人嘩嘩聲,近年還有小生乘機直播求婚,一幕幕的台慶經典時刻成為集體回憶,或許被淡忘也不覺得可惜。

▲ Cosmopolitan.com.hk
▲ Cosmopolitan.com.hk

每年11月19日,TVB都會齊集一眾藝人大肆慶祝台慶,《萬千星輝賀台慶》也曾被視為香港視壇年度傳統大節目。   

▲ Cosmopolitan.com.hk

無綫稱因應社會環境,將2019年11月19日的大型節目改名為《珍惜香港 發放娛樂 TVB 52年》,告別沿用多年的《萬千星輝賀台慶》,以下一幕幕經典Moment會否隨着台慶改名而被觀眾一一淡忘?

▲ Cosmopolitan.com.hk

台慶經典Moment:#1 肥姐踩雞蛋

講台慶集體回憶,不得不提已故鎮台之寶—「肥姐」沈殿霞帶埋大家嘅快樂時光,1987年台慶,身位有番咁上下嘅肥姐身穿紅色運動裝,踩上一層層雞蛋,一步一驚心踩上9層,肥姐最後仲要於雞蛋上扭呼拉圈,就算當時無睇過,而家上網睇片都戥佢肉緊!

▲ Cosmopolitan.com.hk

台慶經典Moment:#2 發哥踩蛋飛筷子

其實1983年仲有當紅小生「發哥」周潤發於台慶踩雞蛋,同時仲用筷子飛插入鐵板,一樣高難度,而佢仲曾經試過表示演吞火雜技,堅係搵命搏!

▲ Cosmopolitan.com.hk

台慶經典Moment:#3 偉仔出牙力拉小型貨車

唔止有發哥,以前嘅台慶仲有電眼王「偉仔」梁朝偉!佢於1987年用牙拉動載滿藝員嘅200斤重小型貨車,貨車頂仲企埋工作人員,真係少啲「牙力」都搞唔掂。

▲ Cosmopolitan.com.hk

只見偉仔谷出驚人力量拉郁貨車,睇到一額汗,佢自己做完都一口鬆氣!

▲ Cosmopolitan.com.hk

台慶經典Moment:#4 星爺玩火送笑彈

以前台慶卡士之強唔係講笑,就係連「星爺」周星馳都多次出動落力表演,除咗用手指為台慶生日蛋糕點火柴,仲曾經同吳孟達合體講笑,一唱一和笑講大台刻薄員工嘅情況,搞到六叔都笑出聲!

▲ Cosmopolitan.com.hk

星爺仲曾經耍埋功夫,同吳孟達玩「隔山打牛」,自己都笑場!

▲ Cosmopolitan.com.hk

台慶經典Moment:#5 楊盼盼玩命挑機高難度動作

講到八、九十年代全盛時期嘅台慶,仲有「楊門女將」楊盼盼做台柱,自小習武嘅佢每年台慶都使出真功夫,表演高難度特技谷行收視,1981年夥拍鄭少秋合作表演單車走鋼線,360度大迴環轉圈,更一度出小意外,要靠主持何守信用竹竿撐着完成動作,睇到全場頻頻尖叫!

▲ Cosmopolitan.com.hk

1985年佢表演繩上舞做空中飛人,無扣安全扣,於半空倒掛踢彩球,嚇到同場主持Do姐都話想喊!

▲ Cosmopolitan.com.hk

台慶經典Moment:#6 吳剛吞火食炭

講高難度動作亦不得不提吳剛師傅,一身肌肉嘅佢最愛搽油演出,成為標記,曾於台慶表演吞炭以及飲滾油,鬆容吞火一幕更睇到身邊嘅「大王」安德尊「O晒嘴」!

▲ Cosmopolitan.com.hk

台慶經典Moment:#7 阿姐孖小生唱跳《熱咖啡》

台慶有「肥姐」同「Do姐」,當然仲有「汪阿姐」汪明荃嘅難忘場面,佢早年率領28位當家小生同男歌手,包括古天樂、古巨基、鄭伊健同張智霖等,唱跳首本名曲《熱咖啡》,當時47歲嘅佢更黑色喱士性感打扮登場,「為你斟到瀉」成為全城熱話及台慶經典!

▲ Cosmopolitan.com.hk

台慶經典Moment:#8 盧海鵬扮欣宜笑到甩肺

早年無線多位著名藝人都係搞笑能手,鄭少秋、曾志偉同盧海鵬等多次於台慶出盡扮嘢本色,好似「扮嘢秋」鄭少秋1995年扮郭富城唱《鐵幕誘惑》,曾志偉2006年扮肥姐等等,但爆都係盧海鵬曾經著全身粉紅衫扮「欣宜BB」,搞到肥姐笑到傻,更自言笑到瀨尿!

▲ Cosmopolitan.com.hk

台慶經典Moment:#9《翡翠歌星賀台慶》

1991年起(1998-2004年期間停辦),每年台慶前都有由當紅歌星參與,男女歌手分成紅白兩組比賽嘅賀台慶節目《翡翠歌星賀台慶》,講得出嘅紅歌手都出現過,包括張國榮、黎明、劉德華、譚詠麟,後期少少就有Eason、容祖兒同何韻詩等,星光熠熠,節目後來去到2008年改為派對及演唱金曲形式舉行,兩年後因版稅問題搞到星光黯淡,直情停辦。

▲ Cosmopolitan.com.hk

台慶經典Moment:#10 王祖藍扮魔術失手求婚

咁台慶近年有經典呢?都係有小生花旦上台演趣劇,但就唔多令人有印象,07年有「福祿壽」李思捷、王祖藍和阮兆祥扮嘢演出,但都唔及14年,王祖藍表演魔術時扮失手,然後突然現身向李亞男求婚,搞到女方爆喊咁有話題性,但都係唔及以前幕幕真材實料演出咁令人難以忘懷。

推薦閱讀:

李施嬅宣佈離巢!TVB 力捧7大花旦做未來視后!

TVB台慶視帝不是唯一出路!蕭正楠成功上位全靠做人能屈能伸

TVB台慶視帝6個冷知識!他獲最多次提名卻只獲獎一次!



Follow us on:

  • Facebook: CosmoHK
  • Instagram: @cosmopolitan_hk
  • YouTube: CosmopolitanHK