《風雨同路不離不棄,其實好難》

幸福快樂嘅時候,生活好容易,兩個人拍拖生活都會過得輕鬆容易。但係其中一方經歷傷心難過嘅時候,生活就唔再容易,兩個人都唔可以獨善其身,兩個人都需要一齊分擔面對。所以快樂時候同你一齊享受好容易,但係經歷苦難時都仍然緊緊捉住你手同你一齊同步過冬,其實好難。

試過有段時間我都經歷過一啲好唔開心嘅日子,當時自己好多負能量,我相信我身邊嘅人都默默承受住我散發住嘅負能量。黑暗嘅時候一枝火柴都係好可貴嘅光芒,所以有一個人願意做嗰枝火柴,係一個好大好大嘅力量。

我都經歷過另一半經歷負能量黑暗嘅時光,我都知道另一半傷心痛苦嘅時候,自己咩都做唔到幫唔到手,連安慰都好難嘅時候,其實壓力係更大。因為你要承擔起另一半嘅負能量,同時你要擺出堅強正能量一面去保護對方。所以一個喺你最黑暗時,願意默默揹起你嘅負能量,靜靜陪住你,真係,非常可貴。

不過好多人經歷完低谷上番高山之後,就會忘記當日陪你走過嘅人,離地太耐都唔記得曾陪伴過嘅可貴。所以唔好做一個唔可以共富豪嘅人,做一個可以風雨同路,亦可以共富貴嘅情人。