食得多紅肉 患乳癌機會大增23%

紅肉、白肉,一直都有唔少研究,有唔少科學權威都證實如果食紅肉太多,係會導致患上大腸癌。不過近日竟然有最新研究指出,紅肉唔單止係大腸癌嘅兇手,仲係乳癌嘅兇手之一喎!台灣報道就指出,台灣一年有一萬位婦女患上乳癌,屬於女性首位癌症!

根據《Medical News Today》所報道,研究團隊搵咗40,000位女性,跟蹤7年並同時記錄佢哋飲食習慣、家族病史等;發現當中食紅肉,即係豬、牛、羊等較多嘅女性,患上乳癌嘅機會係多23%。而一班只食白肉,即係魚、雞等嘅女性,患上乳癌嘅機會係低15%!研究人員就話,雖然未有證據證明食紅肉同患癌有直接關係,不過明顯地以白肉取代紅肉,的確可以減低自己患癌機會。其實紅肉、白肉係點分?原來係決定於肉中嘅肌紅蛋白比例多少而定,而紅肉普偏被視無咁健康,主要係因為紅肉脂肪含量比較高,因此對人嘅健康自然亦無咁好;同時有人亦話雞肉未必完全係白肉,因為雞脾多脂肪及肌紅蛋白,煮出嚟會較接近紅肉。所以有時未必可以仔細分得太清楚,亦無須強迫,無謂徒添壓力啦。