食神教路:快餐店雞肉飯得3塊雞肉 食客憤怒了

去街食飯,好多人都係貪快貪唔使等貪平(比較上),但好多時快餐店真係一分錢一分貨,真實嘅食物多數係「理想與現實不乎」。日前有網民就話喺本港一間日式快餐店雞肉飯食到一肚氣;叫一個雞肉飯,結果只有3片件雞肉,激死佢。有唔少網友留言,話原來呢間餐廳嘅其他食物都係咁上下求其,尤其牛肉飯份量係好隨心,睇廚師心情,仲話如果唔滿意就可以隨時出聲要求再加,而對方又真係會加返比你。唔少網民仲乘機講嘢自己喺餐廳做過兼職,當中令人不寒而慄嘅秘史!

牛肉汁係味粉

好多人以為牛肉飯嘅汁真係由牛肉滲出,其實真係太天真喇,原來係用牛肉味粉,溝水開成;而且溝嘅過程唔係用個煲,係用個大垃圾膠袋套喺垃圾桶到,直接倒入去溝,嘔!

地板當砧板

正常切嘢就用砧板,但係有網民就話因為有時太多Order,要起菜將啲雞扒切開,唔夠枱用惟有坐喺地下,就放塊煮好嘅雞扒直接喺地板到切,以天為被,以地為砧板,真係天人合一嘅境地!

油鑊乜都有

好多快餐店都有油鑊炸食物,啲油就唔使講係萬年油,最恐怖係油鑊入面真係乜都有,有網民話試過因為有人跌咗隻戒指落去被逼要洗鑊,發現入面有無數垃圾,包括銀仔、耳環、耳筒都有!