【高妹煩惱】普遍男士接受女仔最高高度係?

近日Netflix又有新話題就係一套名為《Tall Girl》(愛有六呎高)嘅小品,講述女主角身高有6呎1吋,令佢愛情之路非常崎嶇,因為普遍男人都接受唔到自己伴侶比自己高。電影歸電影,實際上高妹愛情路又係點呢?英國權威調查機構「YouGov」就做過一個詳細調查研究,得出男人眼中女人最理想身高。

統計一開始就指出,英國95%女生身高都介乎5呎(152cm)至5呎11 (180cm)之中,而普遍女仔會答自己嘅高度係5呎4 (162cm)。最重要係訪問咗男士,最理想女仔高度原來係5呎6 (167cm);其中有9%受訪男性係唔介意女仔身高;即係話不足10分之一男士係有機會唔介意女仔太高。

咁女仔自己又點諗?原來女生認為理想身高為5呎(152cm)至5呎7 (170cm),其實都接近男士理想身高。而比較有趣係大部分受訪女士,都希望自己身高比現在再高兩吋,無論自己目前身高是否已經屬於理想身高,大家其實都希望高一啲,呢一點竟然同男士係一樣心態。高,真係無人嫌多。

高妹係咪比較少人追?客觀地答你,喺亞洲人社會的確係,畢竟情侶間女高男矮始終不常見。不過用身高衡量愛情,永遠係唔準嘅尺,不知幾多大好姻緣因為呢一、兩吋而被放棄,何其不成熟,不理想?電影中嘅女主角因為身高被歧視、被放棄,現實中又有幾多高妹受同樣對待呢?

參考資料:YouGov