黑糖珍珠健康啲?同傳統珍珠奶茶比邊個較肥?

香港呢個夏天真係熱鬧非常,因為今年由台灣嚟香港嘅珍珠奶茶大開特開,而且可以跑出嘅都係不外乎「黑糖珍珠奶茶」同「果茶」!大家都知,現代人要健康,想唔肥又想飲甜嘢,以至出現呢股熱潮,果茶固之然係主打健康旗幟,黑糖珍珠奶茶,例如「老虎堂」、「幸福堂」都係大排長龍,其中標榜現炒黑糖比白砂糖有益,而用鮮奶就比奶精無咁肥。咁係咪就可以安心飲用呢?一齊睇下幾大熱門台式飲品有幾肥!(以下份量全用大杯裝700cc計)

黑糖珍珠 600卡路里

雖然係用比較健康嘅黑糖同鮮奶,但其實兩者比較白糖同奶精,只係無咁肥,但同樣係肥仔之選,飲一杯等600卡路里,世衛建議成年一日最多攝取2,000卡路里(女性更只有1,500),飲一杯幾乎等如2至3碗白飯喇!

珍珠奶茶 700卡路里

至於傳統珍珠奶茶呢,原來都係700卡路里,比起成日話「無咁肥」嘅黑糖珍珠,只係肥10%左右。其實根本分別不大,不過當然味道上同「呃Like」度唔夠黑糖珍珠奶茶鬥啦!同埋,如果你再另外加奶蓋,又係另一回事。(詳情下面有講)

不如順便睇下香港人鍾意飲幾大台式飲品有幾肥啦:

抹茶紅豆:500卡路里

芋香奶茶:400卡路里

多多綠茶:700卡路里

另外好多人追捧嘅奶蓋,例如「喜茶」、「貢茶」,每杯就承惠要額外要多加220卡路里,因為奶蓋係用芝士同忌廉組成,肥到不行!

不過算啦,飲得台式飲品,有幾多個仲諗住健康吖,所以就算大家睇完,轉個頭都一定繼續飲啦!