點解做女仔就一定要鍾意小朋友？

小朋友天真可愛，有時又真係覺得好得意嘅！不過，喺香港，好似一開口話唔鍾意小朋友，就會畀人側目喎。小編朋友就親身經歷過，一次喺親戚場合，提起小朋友，講咗句「我麻麻地鍾意小朋友」，然後就極速畀其他人話佢「無愛心」，仲畀奶奶質問「係咪唔想生」呢。其實香港地小人多，有時候喺街見到小朋友走嚟走去，都自不然覺得心煩。有時候真係想大叫：「唔鍾意小朋友唔係罪囉！」一齊睇下以下幾大指控。

「乜你咁無愛心呀！」
無錯呀，好多人覺得鍾意小朋友＝有愛心。其實愛心係展現喺對弱小動物或者需要幫助嘅人身上，有時見到啲身光頸靚肚滿腸肥嘅甩繩馬騮，唔鍾意都唔代表黑心啦！

「小朋友係活潑啲嘅。」
好多時話自己覺得小朋友好煩走嚟走去，人哋就會咁答；其實小朋友活潑唔係問題，但都唔代表一定要包容，有時自己都情緒有心煩嘅時候，已經唔得閒再處理活潑仔。

「你都曾經做過小朋友啦。」
你話唔鍾意小朋友咩？人哋會話你都做過小朋友啦；但其實唔代表可以接受到，宜家又唔係特登去害佢哋，唔通連討厭下都唔得？

「唔係所有小朋友都咁乞人憎嘅。」
有啲人就係咁奇怪，夾硬要迫你鍾意某啲嘢，然後就會拋出呢種令人無可反駁嘅理由。堪稱大絕！