《點解有人可以為滿足男朋友不斷去整容》

最近網上有條訪問片,主角係一個整容接近二十次嘅廿幾歲女生,第一次整容係15歲,而整容嘅最主要原因係因為某一個前男朋友嘅說話。大概都係批評佢呢樣唔靚,嗰樣好醜,於是佢就去整容⋯⋯到最後整哂全塊臉,個男仔就開始話佢個胸太細,佢又去隆胸。

呢個係一個走火入魔嘅故事,大家一定會話痴線啦呢啲咁癲嘅人只係少數啫。係嘅,真係會去到因為個男朋友一句說話,而又有勇氣去將全身可以整嘅地方都整一次嘅人,我相信絕對係少數。但其實有好多人不知不覺中都喺度將自己改變成另一半喜歡嘅模樣。

我聽過最多嘅例子就係女仔個胸唔夠大,而佢又知道男朋友係偏愛胸部大嘅女仔,於是就好自卑,同時又好努力搵方法去升cup,去食豐胸丸,去美容院去按摩升cup⋯⋯又有啲女仔因為男朋友一句「你好肥」就瘋在去減肥⋯⋯有好多女仔真係好努力去變成男朋友想要嘅外表。

「女為悅己者容」,想去取悅自己愛嘅人本來無錯,想喺愛人面前表現最靚一面都係正常不過,但千其唔好過火。外表本來我哋就無能為力去控制,如果一個人喺你身上苛索一啲你根本改變唔到嘅嘢,你絕對無需要配合。例如你同個矇豬眼女仔一齊,然後每日嫌棄佢眼細叫佢去帶大眼仔割雙眼皮⋯⋯咁當初究竟點解要選擇呢個女仔?如果對方只係一個貪圖外表,想要滿足自己內心喜好嘅人,叫佢過主。你唔係泥膠,你無可能一直跟住佢嘅喜好而將自己揑造成唔同嘅樣子。

港女友Facebook