【10 Years Challenge】有邊個敢貼下十年前自己嘅另一半?

時下網絡趨勢嚟得快去得快,「乜乜叉輪住」去到呢排突然興起「10 Year Challenge」,即係貼自己10年前同現在自己嘅Before & After。據講呢個活動一開始係啲大隻佬興起先,Show畀人睇自己10年嘅演變,由瘦仔變身大隻仔嘅過程。不過風潮開始蔓延開就個個都玩埋一份。不過見嚟見去都係朋友自己Post自己改變,而十個有九個只不過係女仔曬命,10年前唔識打扮唔識化妝,到現在變成一位花枝招展嘅女人。講真一開始睇十個八個仲有啲新鮮感,睇得多嚟嚟去去都係咁上下,好鬼悶呀!

如果有人敢玩,10年前自己同另一半嘅合照,同目前而家另一半嘅合照,咁就夠驚喜喇!嗱,不過真係好恐怖,事關有幾多10年前嘅另一半,到而家仲喺你另一半?係嘅,有人真係可以從讀書拍拖開始,一直到生仔結婚,如果可以好似Jason同宋熙年咁貼出嚟,一定好Sweet,如果多埋一個小朋友,成件事更加美滿。不過咁好嘅事你估有幾多?保証如果有人玩呢個Challenge,大部分都係物是人非,可能已經轉咗唔知第幾個男/女朋友。十年前嘅自己,同你另一半嘅愛情,你又記得幾多?可以肯定嘅係,大部分只會記得分開嘅痛、對方對你做成嘅痛,要搵張相貼出嚟,需要嘅其實唔係怕而家另一半嘅眼光,而係勾起心底深面早已埋藏得好好嘅傷疤呢。