3字頭恨嫁女人好恐怖?每年生日都妄想男友會驚喜求婚


無論你係29+1定係28+2都好,總之30歲對女人嚟講就唔單止係一個數字年齡咁簡單,仲係一個好大嘅心理關口!因為一踏入3字頭,就代表己經唔再係女仔,唔可以再咁天真單純,做錯嘢無人會再錫住你包容你,更係一個青春不再嘅代名詞。不過,對於女人嚟講30歲唔單只係一個青春警號,更加會開始擔心自己嘅將來同埋終身幸褔,男仕們你地又知唔知點解佢地會咁擔心咁恨嫁呢?

驚嫁唔出

一去到30歲就代表青春不再,更有人形容女人就好似新車落地一樣,由一落地個刻就已經折舊,愈黎愈唔值錢⋯⋯雖然年紀大少少嘅女性又另一股魅力同韻味,但好似無論幾多歲嘅男人都好,都偏向年紀細啲有青春活力,加上香港女多男少,自然會驚做老姑婆同楔灶罅。

親友壓力

恨嫁壓力除咗係來自自己之外,更多係來自身邊嘅親友同埋同事。可能有日忽然間係FB

見到同年嘅女同學已經結咗婚甚至生埋小朋友,或者至少都已經畀男朋友求咗婚;一年之中點都收到一、兩封同事嘅紅色炸彈,隨口一問原來個女仔年紀仲細過自己!呢個時候再望望自己,唔擔心就假。

充滿幻想

無論係幾多歲嘅女人,對愛情都充滿幻想,而終極嘅愛情就係搵到一個終身伴侶,諗住可以過浪漫嘅二人世界,然後就組織家庭生兒育女,過著甜蜜美滿嘅幸褔生活,慢慢老去然後走完人生。呢份期盼同期待由細細個已經開始形成,到咗3字頭難免有啲心急,成日都諗幾時同埋點解仲未到自己?

驚孤獨終老

女人自知自己年紀愈大,吸引力愈低,Market亦愈來愈少,如果再唔襯「最後的黃金時期」嫁出去,萬一男友唔生性出去滾,就真係「渣」都無。雖然結咗婚嘅男人都有機會出去滾,但至少結咗婚都算係一個保障同更有安全感啦!

相片來源:《三字頭的一顆恨嫁心》

《三字頭的一顆恨嫁心》完整版:http://bit.ly/2x505rW