「Joker」並不罕見?17歲兒童中每3位有2位遇過創傷!

近排最熱嘅電影,一定係《Joker》。以下有少雷,主角由於細路某啲創傷,引致佢成長期間一直被人不正常咁對待,當然亦間接導致佢長大後難以正常生活,喺度唔講太多,免得劇透。不過純粹想大家知道,唔好以為Joker只係電影,事實上根據2016年美國一項研究統計,每3位年滿17歲嘅年輕人,有其中兩位都曾經有過各種各樣童年創傷,即係話現實上Joker,一啲都唔難搵。

美國麻省就有一間專門教育專業人士,如何處理受過創傷嘅兒童。學校名為「Trauma-Informed School」(已知創傷學校),受訓嘅包括教師、社工、心理學家等。因為大家都知,如果唔好好處小朋友因為心理創傷引致嘅問題,後果非常嚴重。學校根據眾多兒童心理學家嘅心血研究,得出一系列教程,廣為全球採用成為教案經典。根據學校統計,童年經歷過創傷嘅小朋友,長大校得到身心健康問題嘅機會幾乎達8成,包括抑鬱症、自殺傾向、過肥、酒精上癮、濫交、癌症等。

至於文章開頭所講,每3位年輕人有2位有過創傷;其實創傷並不一定係指實際肢體虐待或者性侵;原來連家長長時間忽視、對子女要求零回應、不斷指責及恥笑子女、貶低子女自身價值等,都會對子女造成極大創傷,而且程度不比耳聞目睹嘅身體創傷小。小朋友會自少身處高壓力之下,不停擔心自身安危,大腦杏仁體非常活躍咁去偵測周遭危險,令大腦不停釋放壓力賀爾蒙,被稱為「毒性壓力」(Toxic Stress)。有毒性壓力嘅小朋友就會產生情緒及學習問題,人會變得神經質、過度反應、驚慌或暴力傾向等。

「Trauma-Informed School」就清楚表示,作為家長就算未受過佢哋嘅專業訓練,都必須唔可怪責小朋友,以為佢哋係壞係懶或者教唔好;尤其係用傳統方法懲罰佢哋,反而會得到反效果,最壞情況令小朋友放棄學習,走上歪路。作為家長,就算唔理解佢哋,都請你交小朋友畀受過訓練嘅專業人員照顧,切記,要畀小朋友安全感,要令佢哋身心覺得學全,先可以有效咁學習同生活。

參考資料:Trauma-Informed School