LGBTQ中最大族群「雙性戀」 三位雙性戀人士自白

LGBTQ為社會嘅少數,而5大族群之中最大族群原來係當中嘅「B」,即「雙性戀」。根據2016年美國數字,女性有5.5%、男性有2%為雙性戀。當性少眾已經唔再成為忌諱,大家都應該去聆聽及了解佢哋心中嘅聲音,畢竟包容及接納先係世界認同嘅價值觀。如果大家日常中未必有機會接觸佢哋,不妨睇下以幾位雙性戀人士嘅自白。

女性繪圖師Elise Marie

「自小已經對唔少女性人物有幻想,第一個相信係睇《星球大戰》中嘅公主Leia,我會代入自己做Han Solo,去錫公主及拖住佢隻手。但一直我成長過程中我都故意去漠視呢種感覺,我覺得自己係全世界唯一一個女仔會有咁嘅諗法。直至我讀大學時正式知道「雙性戀」呢件事,我知道自己並非唯一,我重新開始欣賞我小時候喜歡嘅女性角色,我知道喜歡嘅唔單止男性,仲有女性。」

男性作家Vaneet Mehta

「我自11歲已經知自己並非直男,我對唔少男性明星藝人都有愛意,但當時我唔認識「雙性戀」呢個詞,直至17歲我身邊有朋友出櫃,我先知原來咁就為之「雙性戀」。但呢位朋友好快就被人笑話佢係「基」,我覺得好疑惑,因為我對女性一樣有興趣,無理由算係「基」。我會幻想自己同男性拍拖、做愛;我甚至愛上咗我嘅同性好朋友(直男),當然我得到唔少傷害及痛楚,但都無阻我大聲講出,我係雙性戀。」

匿名變性陸軍

「我小時候係男性,好細個已經知自己愛男亦愛女,由於我出生自宗教社區,我一直都無向任何人透露,甚至到我大學、以及畢業後我結婚,亦無同老婆透露半句。性取向困擾我多時,我覺得自己可以係任何嘢,但唔係正常男性。直接我出櫃,我決定做變性手術,亦導致我婚姻正式結束。我已經參軍10年,我以後都會直接面對自己係雙性戀,唔會再逃避。」

參考資料:美國國家健康調查報告