Office派帖7大地雷位

Randy Yoong

文章來源: 新婚生活易


講到派帖,唔少新人都嗌頭痛,更糾結應唔應該請上司、同事及下屬!的確,office派帖大有學問,要兼顧辦公室政治之餘,又要怕俾人唱,又怕得失人,真係請又死,唔請又死,派「炸彈」變炸親自己!



1. 上司與管理層
唔少新人都頭痛應唔應該請老細去飲。小型公司裡,可能無太強階級觀念,邀請老細出席唔成問題;至於中大型集團,新人可根據自己階級,只邀請上司及部分相熟管理層出席觀禮或晚宴。



2. 下屬
大家都做過下屬,最怕去俾面Party,甚至被安排與其他部門主管同一枱,真係去飲如返工,咩都就住就住,慘慘豬!作為上司,不如考慮改請下屬觀禮,部門主管及管理層則出席婚宴,避免大家碰頭。



3. 同部門同事
呢個真係走唔甩!新人通常都會請同部門同事出席婚禮。不過,要是你只打算舉辦小型婚宴,無打算邀請同事,但又怕得失人,可以改為邀請觀禮,同事人情又可以包少D,又能見證你的幸福,皆大歡喜!



4. 不同部門的同事
同隔離team平時有合作開,但撇開工作,平日頂多是hi bye friend,咁啱見到傾幾句,微波爐排隊叮飯先見到,咁不如唔好請。當然,為打好關係,扮世界friend,新娘都派下餅卡分享喜悅。



5. 對新入職同事
返新工就要俾$800做人情,猶如未見官先打八十,認真肉痛!新同事為了「埋堆」只能笑住恭喜,實質嬲到你死,從此埋下仇怨種子。但將心比己,你都唔會想一轉新工就要俾人情卦?



6. 自己轉新工
尚未摸熟同事性格,一報到就派炸彈,肯定「遺臭萬年」!分分鐘會在你背後議論一番!作為新同事,都係派餅好過派帖!



7. 舊同事
轉過N份工,同舊同事幾乎唔見面,有部分亦只靠whatsapp吹水、傾下舊公司是非。呢個情況下,大家都係酒肉朋友,無謂專登約出嚟派帖啦!

Text_Fanny (Editor's Blog)


更多最新婚嫁資訊及貼士:

https://wedding.esdlife.com/

婚享同學會Blogger真實分享:

https://wow.esdlife.com/wedding-union/

Wedding.ESDlife FB:

https://www.facebook.com/Wedding.ESDlife