【People of Hong Kong】 賣花的男人最懂浪漫

我在擺花街開花店咁耐,從未見過好似依家咁靜。

情人節之前嗰晚我做到凌晨兩點,街上一個人都無,溫度得嗰十零度,好鬼凍;但無辦法,搵食嘛!

跟住十二點又返嚟做啦,情人節呀,以前呢一日做成個月生意,但依家生意難做,俾一場武漢肺炎搞彎哂,仲衰過沙士。

其實開花店好辛苦㗎,鮮花晚上送嚟,兩公婆便要分門別類,執頭執尾,又要掂水,手都爛哂㗎,由天光做到夜晚,一日十八小時,兩公婆輪流看檔。

喺度開檔日曬雨淋預咗㗎嘞,做唔緊要,最怕係無人欣賞,鮮花會謝㗎,睇住啲花開哂無人買,錢不是最重要,而是覺得很可惜。

(咁點樣襯花?送什麼花最好?識唔識花語?)你講乜嘢花語呀?我唔識㗎!紮花望落去合眼緣咪靚囉,你鍾意咪靚囉,唔使咁多花臣喎,係啲呃錢花店搞埋啲⋯⋯乜嘢gimmick話⋯⋯

其實呢唔怕講喎,香港男人不解女性溫柔,吓吓都講錢,情人節買紮花又嫌貴,幾十蚊氹吓女人開心都阿吱阿咗,其實呢,女人收花一定開心,真的唔識浪漫,相反啲外國人飲完酒行過,買支花送給女伴,啲女仔笑到見牙唔見眼。

(咁你有送花俾老伴?蘇太坐在一旁工作。)

「送乜鬼吖,我開花店,佢日日對住啲花,仲使乜我送?我寧願佢早啲返屋企休息,喺條街度好凍㗎!


撰文:羅馬
攝影:西西里

___________________
活過不白過
Follow us on IG:https://bit.ly/2yjkquY
___________________

#OnlyLiveOnce #peopleofhongkong #花店 #擺花街 #不解溫柔 #送花不送花