【People of Hong Kong】路邊有檔報紙檔

「(很久沒見,近來可好?)之前有點頭赤赤,作感冒,便不出來看檔了,仔女很擔心,叫我家休息。你知啦,依家新冠肺炎咁厲害,他們擔心也是正常的。」

「我好憎戴口罩,好唔自在;以前沙士都無戴,但今次一定要戴,好厲害隻菌。

「但我寧願要落嚟報紙檔,見吓街坊;你知啦,一個人坐喺屋企好悶,我寧願落嚟看檔,時間過得快一點。當然啦,我們要她做好防範措施,戴上口罩勤洗手啦。

「唉,(一家人)賣報紙賣咗五十多年,從未見過好似依家生意咁難做,人少了,大陸遊客少了,都無人買嘢。(關大陸遊客什麼事?)哦,他們落嚟總會買點禁書,像政治書籍、鹹濕雜誌返酒店慢慢睇。」

「其實依家買報紙搵唔到食啦,個個都上網睇,邊有人買報紙㗎;以前(九十年代)啲人朝早買早報,夜晚買晚報,由朝做到晚;凌晨兩點已經落嚟叠報紙;呢,壹週刊未出之前,人們已排哂長龍爭住買,一個報紙檔都賣過百本,排隊俾錢;依家壹週刊都摺埋,我哋又算啲乜。」

「以前開報紙檔好好賺㗎,可以養活一家三口養妻活兒,我啲仔女都要幫手,女兒幾歲已經要幫手;做到依家五十幾;依家純粹賺餐晏仔,反正有個牌,做得幾耐得幾耐囉;但唔怕講,你都知道香港已經越來越少報紙檔(編按:據香港大學社會學博士莊玉惜指,全盛時香港約有2, 500個報紙檔,已在只剩下400多檔),無得做都無辦法。」

「但係呢,好在有街坊,雖然賺你一個幾毫,但一些老街坊跟我買報紙幾十年,唔講都知道佢睇邊份,你買東方嘛(其實,我是買蘋果的)過嚟買份報紙閒話家常,唔係什麼大生意,但就是人情味囉;前排我沒有口罩都係街坊送幾個俾我;貴過份報紙呀。」

「有啲客仲同我講,其實屋企樓下便利店都有報紙、煙仔買,但就係特登過嚟同我哋買,支持我哋,呢啲咪係街坊街里囉!」

真不知幾年之後,路邊報紙檔會否變成香港人回憶中的風景⋯⋯

撰文、攝影:郭晞雅